ВЫЛЬ ПАШЛЫ
Чолӧм да здорово, сё муса друг! Письмӧ тэд гижыштны мӧвпышті друг. Кывбуръяс страпайтны мастерӧсь ми, Рифмаяс корсявны кужам зэв сюся, Юр вемын ломалӧ творчество би, — Прӧста ӧд огӧ поэтъясӧн шусьӧй. Здукӧн ми лэптам куимсё строчка, Кывъяссӧ торйӧдлам, синмӧ мед кочкас: «Удар - нӧй кад. Удар - нӧй удж. И кыптіс кось, И юргӧ ӧд». Сідзи и тюрӧ со, сідзи и тюрӧ! Ме ог тӧд, кыдзи и сюрӧ! Кыв джынйыд — строчка, «И» шыпас — строчка, Знак «запятая» да «точка», Коркӧ, дерт, босьтам на мода — «Точка» дзонь строчкаӧ водас! Дыр-ӧ нӧ чуткыны чут? Миянӧс некод оз кут! Лыддьысьысь коми морт сьӧда на олӧ, Нинӧм поэзия кузя оз тӧд, Мӧвпыштас: гашкӧ пӧ, тадзи и колӧ, Гашкӧ пӧ, татшӧм поэтъяслӧн ӧд... Тайӧ, дерт, дзоляник шутка. Татчӧ ме точка, час, чутка. Гусьӧник висьтала, сё муса друг: Миянӧс гижӧмысь некод оз дзуг. Позьӧ дзик веськыда шуны — Тэнӧ ни менӧ, Воам кӧть венӧ, Ни ӧти мортлы не суны! Миян быд кывбур зэв яр — Кыпӧдӧ мир, Пузьӧдӧ вир: «Зым! Гым! Йирк! Тар!» Повзьӧма непӧштӧ сикт, Тіралӧ тшӧтш Сыктывкар, Со кыдзи йиркӧдӧ стих! Муыс и сынӧдыс вӧрӧ, Слабджык морт кок йывсьыс пӧрӧ, Чардби кодь дзик, — Со кутшӧм стих!.. Пушкаысь тадзи не лыйны! Ачыд тэ артав, Заклад кӧть вартам, — Ни ӧти мортлы не кыйны!.. Ок, другӧ, сё муса Паш! Веритан! Дрӧж босьтӧ менӧ... Нимкодьла! Пӧрысь-ӧ-нэмӧ Вермам на сетны ми гаж: Не Тима Вень, — Не на Педь Гень, Пушкинысь бур балагуръяс, Со кутшӧм миян бур юръяс! Миян моз некод оз зіль Лӧсьӧдны гижан сям — стиль. Мукӧдлӧн быд гижӧд ӧткодь — Пыр схематизм; Миянлысь босьтан да, нӧк кодь — Бур реализм. Пыр выльысь-выль, — Абу нӧ збыль?.. Мый ме тан кайта, Тэ, кӧнкӧ, чайтан: Виктор пӧ шмонитӧ бара? Эн, другӧ, сідзи тэ гарав: Шмонитны ӧні ог кут!.. Бара, час, пуктыла чут. Лирика, лирика, кӧні нӧ тэ? Кытчӧ нӧ миянысь пышйин? Кывбурӧй, кывбурӧй, омӧльтчин тэ: Вылыстӧ мичмӧдны ышмим. Сы вылӧ перӧным миян век ёсьмӧ, Сӧмын тай пытшкӧсыд тэнад век косьмӧ. Сэсся ме помала, шаньлы. Висьтав поклон Тит Паш Ваньлы! Мыйкӧ тай вель уна гижи да лэдзи-а. Чуксала тэчны художествоа поэзия! Сиа быд бурсӧ, быдтор!
Гижӧд
Выль Пашлы
Жанр: 
Гижан кад: 

lkejrlkelkrgner klrjnelknfrkl ekjnrjkenfrej