КОДІ КӦНІ КАНИКУЛАСЬӦ

Ӧні ми велӧдчам Сыктывкарса университетын, филология факультетын, ӧти группаын. Олам Сыктывкарын. Но каникуласям век гортъясын, коді кӧні.
Безносов Олеглӧн ай-мамыс олӧны Визинын, уджалӧны видз-му овмӧс кооперативын. Тайӧ сиктыс ыджыд да мича. Югов Иванлӧн мамыс олӧ Кебраын, важ коми сиктын, сійӧ уджалӧ выль вузасянінын, а дядьыс сылӧн бур шопер, уджалӧ вӧрын. Рочев Юралӧн ордвужыс олӧны Изьваын да Сибырын, но сылӧн мам-батьыс ӧні уджалӧны Ухтаын, найӧ тӧлка бурдӧдчысьяс.
Кузьчуткомов Петыр олӧ кузь Выльгорт сиктын ӧти судтаа керкаын, сэні тшӧтш олӧны сылӧн ай-мамыс, чой-вокыс, Лыско понйыс да Сьӧдбӧж нима каньыс.
Попова Вералӧн рӧдвужыс олӧ Кӧрткерӧсын, айыс уджалӧ вӧрын, сійӧ нималана пӧрӧдчысь, а мамыс велӧдӧ сиктса школаын, сійӧ велӧдысь. Вералӧн Валя нима ыджыд чойыс ӧні пукалӧ гортын, сылӧн пӧ эм ичӧт кага. Валялӧн верӧсыс велӧдчӧ на Сыктывкарын, Вӧр институтын.
Ме ола Сыктывкарын, стӧча кӧ Эжваын, ылі микрорайонын, менам Василь чожлӧн ӧти вежӧса патераын. Менам ай-мамӧй олӧны Кулӧмдінын, ыджыд да кузь важ сиктын. Сэні кывтӧ паськыд Эжва ю, гӧгӧр быдмӧ сук сьӧд вӧр. Менам пӧрысь мамӧй олӧ орчча Дон сиктын, сійӧ пенсия нин босьтӧ. Гожӧмъясын сійӧ пыр уджалӧ град йӧрын, турун пуктӧ. Ме каникулася век гортын, Кулӧмдінын.
Студентъяслӧн ордвужыс тшӧтш олӧны карын да сиктын Роч му пасьтала, но унджыкыслӧн ай-мамыс олӧны да уджалӧны Коми муын.

 

Цыпанов Е. А. Видза олан, коми кыв! (2015)