МЕНАМ РАДЕЙТАНА ВЕЛӦДЫСЬ

Менам медрадейтана велӧдысь — Раиса Ивановна Вагнер. Сійӧ коми кыв да литература велӧдысь. Уджалӧ Искусствояс гимназияын.
Раиса Ивановна — кузьмӧс чужӧма, ыджыд лӧз синма, веськыд ныра, абу ыджыд тушаа, вӧсни коска, мича нюмбана, мелі гӧлӧса нывбаба. Юрсисӧ мичаа чукӧртӧ. Радейтӧ новлы­ны блузка, пинжак да гач.
Сійӧ гимназияын медся мелі да медся шань велӧдысь. Пыр отсалӧ велӧдчысьяслы, сетӧ оз сӧмын тӧдӧмлун, но и ассьыс сьӧлӧмсӧ. Аслас бур уджӧн петкӧдлӧ том йӧзлы пример.
Раиса Ивановна — медся тӧлка. Сійӧ пыдди пуктӧ да пӧ­ся радейтӧ ас чужан кыв. Раиса Ивановна мичаа, сӧстӧма сёр­нитӧ комиӧн, бура тӧдӧ коми кывлысь историясӧ. Чужтӧ че­лядь сьӧлӧмъясын Коми му да коми кыв дінӧ муслун. Урокъяс вылын, кор велӧдчысьяс мыйкӧ оз тӧдны, сійӧ тшӧкыда шу­лывлӧ: «Марс вылысь усьӧмаӧсь». Ме пыдди пукта Раиса Ивановнаӧс да аттьӧала сійӧс зумыд тӧдӧмлунъясысь.
А кутшӧм мича да озыр велӧдысьлӧн кабинетыс! Ӧшинь­яс вылын быдмӧны уна рӧма дзоридзьяс; шкапъясын сулалӧ­ны коми небӧгъяс, ыджыд кывкудъяс; стенын ӧшалӧны коми гижысьяслӧн да учёнӧйяслӧн портретъяс; класс помын эм коми музей. Комияслысь важ паськӧм, ыджыд ыргӧн самӧвар, печкан да уна мукӧд кӧлуй сэтчӧ чукӧртісны асьныс велӧд­чысьяс. 

(А. Ельцова серти)

Коми кыв. 6 класс (2018)