«ЗАРНИ ЁЛЬ» РЕСТОРАНЫН

Сыктывкарын Сӧветскӧй улича вылын эм зэв бур «Зарни ёль» ресторан. Тані позьӧ чӧсмасьны коми йӧзкостса сёян-юанӧн. Кротов Павел группасӧ корис рытнас ресторанӧ. Автобусысь на аддзис Кузькокова Аннаӧс. Анна мича гӧрд платтьӧа да сьӧд туплиа, кудриа сьӧд юрсиа да ӧмидз рӧма вом доръяса. Павел сьӧд костюма да еджыд дӧрӧма.
Ресторан дорын Павел да Анна виччысисны группаса ёртъясӧс. Петыр Кауфман вайис Оленёва Снежанаӧс машинаӧн. Нӧшта дас минут виччысисны Швец Миколаӧс да велӧдысьӧс. «Зарни ёльын» сёян новлысьяс сёрнитӧны комиӧн.
— Мый кӧсъянныд сёйны? — сёян новлысь юаліс Павеллысь.
— Ме кора шома капустаысь квайт салат, жаритӧм чипан картупеля рокӧн квайт порция да пув ва квайтӧс жӧ, ӧти черинянь, нывъяслы кос вина, а мужичӧйяслы чӧскыд тагъя сур.
Дыр на чӧсмасисны ёртъяс коми йӧзкостса сёян-юанӧн, кывзісны музыка. Петыр Кауфман корліс йӧктыны Снежанаӧс да Аннаӧс. Ёна и гажӧдчисны. Ставыс вӧлі зэв чӧскыд. Найӧ аттьӧалісны «Зарни ёльса» уджалысьясӧс да мунісны ресторанысь кыпыдӧсь да пӧтӧсь.

 

Моторина Л. А., Сизева Ж. Г., Цыпанов Е. А. Рӧмпӧштан (1999)