ПЕРЫМСА СТЕПАН

Тайӧ мортыс овліс квайтсё во сайын. Оз помнитны сійӧс весиг сё арӧса пӧльяс да пӧчьяс.
Сэки миян Эжваным вӧлі паськыдысь-паськыд, джуджыдысь-джуджыд. Пармаын быдмис сук вӧр. Сэні олісны быдсяма звер-пӧткаыс. Юяс да тыяс вӧліны зэв озырӧсь чериӧн.
Коми войтырлӧн пӧль-пӧчьясыс вӧравлісны, кыйлісны чери, вотлісны тшак-вотӧс, чукӧртлісны бурдӧдчан турунъяс, быдтылісны сю. Парманым вердліс найӧс яя сёянӧн, пасьтӧдліс шоныд паськӧмӧн.
Эжваным аслас вожъясӧн шусис Эжва Перымӧн. Быдсикас озырлуныс вӧлі тайӧ му вылас. Но эз вӧв анбур, эз вӧвны шыпасъяс.
Йӧз эз кужны гижны.
Сюсь, вежӧра да тӧлка зонка волывліс коми йӧз ордӧ ыджыд батьыскӧд. Том морт казяліс, мый тані олысь йӧзсӧ кыскӧ грамотаӧ. И сэк Степан думыштіс лӧсьӧдны Эжва Перымын олысьяслы анбур.
Буретш таысь коми войтыр кутіс шуны ассьыныс медводдза велӧдысьсӧ Перымса Степанӧн. Кувсис сійӧ 1396ʼ вося апрель 26ʼ лунӧ (важ календар серти). Дзебисны Степанӧс Мӧскуаса Кремльӧ.

Югыд кодзув. 4 класс. 1. (1999)