ТУЛЫС ВОӦМ

Лунвывсянь пӧльтӧ небыд тӧв, енэжын шондіыс вылі нин ветлӧ, дзирдалӧ югыда — синтӧ ёрӧ. Сывны нин заводитӧма лым, топалӧ, сӧнікӧ пӧрӧ, кок улын сыв. Толаыс ляпкалӧ, чинӧ. Гӧгӧр дзик прӧстмӧ.
Ӧдзӧсыс тулыслӧн паськыда воссьӧ... Ывлаыс гораммӧ. Гажа сэн, гора и кыпыд. Енэжыс кыптӧ зэв вылӧ. Кымӧръяс качӧны.
Тёпкӧ-виялӧ вевт вылысь войтва... Долыдджык кажитчӧ ракалӧн кравзӧм.
Ыліӧдз ывлаын сёрнияс кылӧны... Зіль йӧзлӧн керасьӧм. Со детинка керкаысь ывлаӧ петіс, керкаын тулысын гажтӧм. Видзӧдліс ӧтарӧ, мӧдарӧ... Сьӧлӧмсьыс нимкодя мый вомас тӧрис горӧдіс: «Э-э-эй!» Сэсся тай садьтӧгыс котӧртіс кытчӧкӧ водзӧ...
Бузгӧны сёнъясӧд ӧдӧбӧн шоръяс... Гӧгӧр дзик ловзьӧма, нюмъялӧ-сьылӧ... (Тима Вень.)

Эзысь тӧлысь. 3 класс. 2. (1999)