***

Ми олам Коми республикаын. Сылӧн ыдждаыс нёльсё дас вит сюрс квадрата километр. Коми му войвылын – тундра, лунвылын – лыска да коръя вӧр. Вӧръяс озырӧсь тшакӧн да вотӧсӧн, вӧрса пемӧсӧн да лэбач-пӧткаӧн.
Коми муын уна ичӧт да ыджыд ю. Медся ыджыд да вына юыс – Печора. Сійӧ пырӧ Европаса медыджыд юяс лыдӧ. Юясын олӧ уна сикас чери.
Республикаын дас кар: Сыктывкар, Воркута, Инта, Ухта, Усинск, Сосногорск, Емва, Микунь, Печора, Вуктыл. Войвывса каръясын олӧны из шом, биа-ру да мусир перйысьяс. Микуньын да Емваын – кӧрт туй гӧгӧр уджалысьяс.
Посёлокъясын олӧны вӧр лэдзысьяс, сиктъясын – му вӧдитысьяс да скӧт видзысьяс. Медыджыд сиктъясыс Комиын Абъячой, Айкатыла, Визин, Выльгорт, Изьва, Койгорт, Кӧрткерӧс, Кослан, Кулӧмдін, Чилимдін.
Каръясын да вӧр посёлокъясын унджык олысьыс сёрнитӧ рочӧн. Комиӧн сёрнитысьыс кызвыннас сиктса йӧз.
Коми республикалӧн юркарыс – Сыктывкар. Сійӧ пуксьӧма Сыктыв ю дорӧ. Татысь и артмӧма нимыс. Медводдза нимыс Сыктывкарлӧн – Усть-Сысольск, коми ногӧн Сыктывдін. 1930-ӧд воӧ Усть-Сысольсклы сетісны выль ним –Сыктывкар.
Медводдза велӧдчанін Сыктывкарын воссис сюрс кӧкъямыссё кызь кыкӧд воӧ, сюрс кӧкъямыссё комын сизимӧдӧ – медводдза библиотека. Ӧні Сыктывкарын куим ВУЗ, некымын театр, уна ичӧт да ыджыд библиотека. Эжва, Улыс да Вылыс Чов, Дырнос, Кӧчпон, Орбита, Тентюково, Париж, Кируль, Затон, Максаковка – ставыс тайӧ Сыктывкарлӧн юкӧнъяс.
Сыктывкар абу ёна ыджыд. Но воысь воӧ сійӧ быдмӧ да мичаммӧ. Кыптӧны уна судта выль керкаяс, дзескӧдӧны важъяссӧ.
Сыктывкар зэв мича, торъя нин гожӧмнас. Туйяс пӧлӧн быдмӧ уна пу. Синтӧ гажӧдӧны уна рӧма, мичасьыс мича дзоридзьяс.

Дружинина Т. Е. Самоучитель коми языка (2007)