КОМИ МУ УНА ЛЫДПАСЫН

Коми республика – зэв ыджыд му, сылӧн пасьтаыс нёльсё дас вит сюрс квадрата километр. Став пасьтаысь квайтымын ӧкмыс прӧчентыс вӧр. Вӧрыс Комиын зэв уна – ставнас кызь кӧкъямыс миллион сизимсё сюрс гектар. Став вӧрысь лыска пуа вӧрыс кӧкъямысдас ӧти прӧчент, коръя пуаыс сӧмын дас ӧкмыс прӧчент. Республикаын эм тшӧтш уна нюр, унджыкыс тундраын. Став муысь дас кык-дас вит прӧчентыс нюр.
Поводдяыс Комиын тшӧтш аслыспӧлӧс: гожӧмыс дженьыд да шоныд, тӧлыс кузь да кӧдзыд. Тӧвшӧр тӧлысьын, январын шӧр температураыс лунвылын, Сыктывкарын, дас вит градус кӧдзыд, а войвылын, Вӧркутаын, кызь градус кӧдзыд. Гожӧмын, юльын Сыктывкарын шӧр температураыс дас квайт градус, а Вӧркутаын дас ӧти градус шоныд.
Чужан луныс Коми республикалӧн гожӧм помын, моз (август) кызь кыкӧд лунӧ. Коми автономия котыртӧма вӧлі сюрс ӧкмыссё кызь ӧтиӧд воӧ.

Цыпанов Е. А. Видза олан, коми кыв! (2015)