КОМИ РЕСПУБЛИКАСА ОЛЫСЬЯС ЙЫЛЫСЬ

Коми республикаын кык сюрс квайтӧд воын оліс ӧкмыссё сизимдас ӧти сюрс витсё морт, ставнас сёысь унджык войтырсикаса йӧз. На пиысь каръясын олӧны йӧзысь сизимдас квайт прӧчентыс, а сиктъясын — кызь нёль прӧчентыс. Ӧні республикаын эм дас кар: Сыктывкар, Вӧркута, Вуктыл, Емва, Инта, Микунь, Печора, Сосногорск, Усинск да Ухта. Каръяс лыдысь Сыктывкар юркар, Вӧркута да Ухта медыджыдӧсь. Кызьӧд нэм чӧж каръяс зэв ӧдйӧ быдмисны, сэтчӧ воисны овны мукӧдлаысь уна йӧз. Комынӧд воясӧ кӧ Коми муын вӧлі сӧмын ӧти ичӧт кар — Сыктывкар, то ӧні нин дас кар. Республикаса войвыв каръясын олӧны да уджалӧны из шом перйысьяс (Вӧркутаын да Интаын), биару перйысьяс да мусир перйысьяс (Ухтаын, Усинскын, Вуктылын). Эжваын олӧны кабала вӧчысьяс, Микуньын — кӧрт туй вылын уджалысьяс. Войвывса каръясын олысьяслӧн олӧмыс да уджыс абу кокньыд кӧдзыд ывлару (поводдя) вӧсна, кузь тӧв понда.
Коми войтыр олӧ сиктса районъясын да Сыктывкарын, мукӧд карын тшӧтш. Республикаын медся гырысь сиктъяс — районса шӧринъяс, юрсиктъяс: Айкатыла, Визин, Выльгорт, Изьва, Койгорт, Кӧрткерӧс, Кослан, Абъячой, Кулӧмдін да Чилимдін. Чилимдін районын олӧны рочьяс. Сиктса олысьяс пиысь унджыкыс му вӧдитысь да скӧт видзысь. Изьва да Печора вожъясын, войвывса тундраын олӧны да уджалӧны кӧр видзысьяс. Вӧрса посёлокъясын уджалӧны вӧр лэдзысьяс, пӧрӧдчысьяс. Важӧн моз тшӧтш коми йӧз да республикаса уна мукӧд олысь радейтӧны вӧр-ва, вӧралӧм, вотчӧм да чери кыйӧм.
Уна коми йӧз олӧ тшӧтш Коми республикаысь ортсыын, Рытыввыв Сибирын, Хант-Манси да Ямал-Яран автономия кытшъясын, Кола кӧджын, Яран автономия кытшын, мукӧд обласьтъясса каръясын да сиктъясын. Республиканымса став олысь лыдысь кызь квайт прӧчентыс коми войтыр.

Цыпанов Е. А. Видза олан, коми кыв! (2015)